चितवन: नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टी (रास्वपा) का नेता तथा कार्यकर्तालाई पार्टीभित्र हुने कमजोरी र गलत अभ्यासप्रति पनि स्पष्ट रूपमा आवाज उठाउन आग्रह गर्नुभएको छ। रास्वपाको प्रथम महाधिवेशनलाई सम्बोधन गर्दै उहाँले सुशासनको आधार आफ्नै संगठनभित्रको जवाफदेहिता र आत्मसमीक्षा भएको बताउनुभयो।
थापाले विगतमा राजनीतिक
दलहरूले नेतृत्वलाई प्रश्नभन्दा माथि राख्ने प्रवृत्तिका कारण संस्थागत कमजोरी
भोग्नुपरेको उल्लेख गर्नुभयो। उहाँका अनुसार नेताप्रति अत्यधिक निष्ठा देखाउँदै
आलोचना र प्रश्नलाई दबाउँदा सुशासन तथा लोकतान्त्रिक संस्कार कमजोर बन्न पुगेका
छन्।
उहाँले राजनीतिक
प्रतिस्पर्धीविरुद्ध संघर्ष गर्नुभन्दा आफ्नै दलभित्र रहेका विकृति, कमजोरी र गलत अभ्यासको सामना गर्नु अझ
चुनौतीपूर्ण हुने बताउनुभयो। कांग्रेसले पनि समय–समयमा आन्तरिक सुधारका लागि
पार्टीभित्रै संघर्ष गर्नुपरेको अनुभव साझा गर्दै उहाँले रास्वपालाई पनि आवश्यक
परे आफ्नै नेतृत्वमाथि प्रश्न उठाउन सक्ने वातावरण निर्माण गर्न सुझाव दिनुभयो।
रास्वपाले छोटो समयमै
हासिल गरेको जनसमर्थनलाई उल्लेख गर्दै थापाले त्यसलाई दीर्घकालीन बनाउन लोकतान्त्रिक
अभ्यास, विधिको सम्मान र
आत्मसमीक्षाको संस्कृति अपरिहार्य रहेको धारणा राख्नुभयो। विगतमा जनताको ठूलो
समर्थन पाएका केही राजनीतिक शक्तिहरू आन्तरिक कलह र नेतृत्वको अहंकारका कारण कमजोर
बनेको उदाहरण दिँदै उहाँले रास्वपालाई त्यस्ता त्रुटिबाट बच्न आग्रह गर्नुभयो।
कांग्रेस र रास्वपाबीच
राजनीतिक प्रतिस्पर्धा स्वाभाविक भए पनि सम्बन्ध शत्रुतापूर्ण नभएको स्पष्ट पार्दै
उहाँले राम्रो कामको समर्थन र गलत निर्णयको आलोचना गर्ने कांग्रेसको नीति रहने
बताउनुभयो।
नयाँ पुस्तालाई लोकतान्त्रिक आन्दोलनको इतिहास र बलिदान सम्झन आग्रह गर्दै थापाले वर्तमान राजनीतिक स्वतन्त्रता र लोकतान्त्रिक अधिकारहरू विगतका संघर्ष र सहिदहरूको योगदानबाट सम्भव भएको उल्लेख गर्नुभयो। उहाँले राजनीतिक यात्रा अगाडि बढाउँदा इतिहासका ती योगदानहरूलाई सम्मान गर्नुपर्ने धारणा व्यक्त गर्नुभयो।
सम्बोधनको अन्त्यमा
थापाले लोकतन्त्र, विधिको शासन र
सुशासनप्रतिको प्रतिबद्धता दोहोर्याउँदै कानुन र प्रक्रियाको उल्लंघन हुने जुनसुकै
अवस्थामा पनि कांग्रेसले निरन्तर खबरदारी र प्रश्न उठाउने बताउनुभयो।
