काठमाडौं । व्यवसायीहरूको शक्तिशाली अखडा मानिने नेपाल उद्योग वाणिज्य महासंघको चुनाव यसपटक केवल औपचारिक प्रतिस्पर्धा मात्र होइन, पुरानो विरासत र नयाँ पुस्ताबीचको भिडन्तको रूपमा देखिन थालेको छ। यही भिडन्तको केन्द्रमा उभिएका छन्—पानी उद्योग महासंघका अध्यक्ष ध्रुव बहादुर गौतम।
वस्तुगत तर्फ कार्यकारी सदस्य पदमा उम्मेदवारी दिएका गौतम अरू उम्मेदवारभन्दा फरक चिनिन्छन्—उमेरले कान्छा, तर सोचले आक्रामक। व्यवसायमा सानैदेखि होमिएका उनी अहिले महासंघको नेतृत्व तहमा *“नयाँ पुस्ताको प्रतिनिधि”*को रूपमा उभिएका छन्।
उनको उम्मेदवारी सार्वजनिक भएसँगै बजारमा एउटा प्रश्न गुञ्जिन थालेको छ — “के अब महासंघमा पुस्तान्तरणको समय आएको हो?”
शिव प्रसाद घिमिरे समूहबाट चुनावी मैदानमा उत्रिएका गौतमले पोस्टरमार्फत आफ्नो टिम र योजना सार्वजनिक गरिसकेका छन्। उक्त समूहले महासंघ अहिले जटिल मोडमा रहेको भन्दै नयाँ ऊर्जा, स्पष्ट दृष्टिकोण र व्यवसायीमैत्री नीतिको आवश्यकता औंल्याएको छ।
गौतम भने अझ स्पष्ट सुनिन्छन्। उनी भन्छन्—महासंघ केवल ठूला उद्योगीहरूको प्लेटफर्म मात्र होइन, साना र मझौला व्यवसायीको आवाज पनि हुनुपर्छ। यही सन्देश लिएर उनी देशभर व्यवसायीहरूबीच पुगिरहेका छन्।
चुनावी माहोल ततिँदै जाँदा धेरैले गौतमलाई “डार्क हर्स”को रूपमा हेर्न थालेका छन् — कम बोल्ने, तर प्रभाव पार्ने उम्मेदवार।
पुराना अनुहारहरूको वर्चस्वबीच नयाँ पुस्ताले ठाउँ बनाउन खोजिरहेको यो क्षणमा गौतमको उम्मेदवारी केवल व्यक्तिगत प्रयास मात्र होइन, एक प्रकारको संकेत पनि हो — अब महासंघको राजनीति बदलिन सक्छ।
अबको केही दिनमै मतपेटिकाले निर्णय गर्नेछ— अनुभवको भारी जित्ने कि ऊर्जाको हुंकार?
