काठमाडौं:- फिफा विश्वकप २०२६ को अन्तिम १६ मा नर्वेसँग २–१ गोलअन्तरले पराजित हुँदै ब्राजिल प्रतियोगिताबाट बाहिरिएपछि ब्राजिली स्टार नेयमारले अन्तर्राष्ट्रिय फुटबलबाट सन्यासको घोषणा गरेका छन्। ३४ वर्षीय नेयमारले झण्डै १६ वर्ष लामो राष्ट्रिय टोलीको यात्रा यही खेलसँगै अन्त्य गरेका हुन्।
न्यू जर्सीस्थित मेटलाइफ
स्टेडियममा भएको खेलको अन्तिम ह्वीसल बज्नासाथ नेयमार मैदानमै भावुक बनेका थिए।
उनी केहीबेर घाँसमै बसेर आँसु झारिरहेका थिए भने टोलीका खेलाडीहरूले उनलाई
सम्हाल्ने प्रयास गरेका थिए। त्यसपछि उनले ब्राजिलको जर्सी निधारमा राख्दै
राष्ट्रिय टोलीसँगको यात्रालाई भावुक रूपमा बिदाइ गरे।
खेलपछि पत्रकार सम्मेलनमा
नेयमारले ब्राजिलका लागि त्यो आफ्नो अन्तिम खेल भएको घोषणा गर्दै अब राष्ट्रिय
टोलीबाट नखेल्ने बताए। उनले देशका लागि खेल्नु आफ्नो जीवनकै सबैभन्दा ठूलो गौरव
भएको उल्लेख गर्दै विश्वकप उपाधि जिताउने सपना पूरा गर्न नसकेको पीडा सधैं रहने
बताए।
ब्राजिलका सर्वाधिक
गोलकर्ता नेयमारले राष्ट्रिय टोलीका लागि १३० खेलमा ८० गोल र ५९ असिस्ट गरेका छन्।
उनले सन् २०१० मा राष्ट्रिय टोलीबाट डेब्यु गरेका थिए र चारवटा विश्वकप खेलेका
थिए। अन्तर्राष्ट्रिय करियरमा उनले सन् २०१३ को कन्फेडेरेसन कप जितेका थिए भने
रियो २०१६ ओलम्पिकमा ब्राजिललाई स्वर्ण पदक दिलाउन महत्वपूर्ण भूमिका खेलेका थिए।
नेयमारको सन्यास घोषणापछि
सामाजिक सञ्जालमा विश्वभरका फुटबल समर्थकहरूले उनको योगदानको प्रशंसा गर्दै भावुक
प्रतिक्रिया जनाइरहेका छन्। विश्वकप उपाधि जित्न नसके पनि उनी ब्राजिलको इतिहासका
सर्वकालीन महान् फुटबलरमध्ये एकका रूपमा सम्झिने विश्वास समर्थकहरूले व्यक्त गरेका
छन्।
