स्थानीय र प्रहरीबीचको झडपमा भारतीय प्रहरीका होम गार्डको मृत्यु

बारा- बारा जिल्लाको सिम्रौनगढ नगरपालिकाको बसवरिया गाउँसित जोडिएका भारतीय गाउँ झरोखर–आमवा सडक खण्डको महादेव मन्दिर नजिक स्थानीय र प्रहरीबीचको झडपमा परी भारतीय प्रहरीका सहयोगीको मृत्यु भएपछि सीमा नाकामा आउजाउ बन्द भएको छ । स्थानीयको कुटाइबाट उनको मृत्यु भएको र अन्य सात प्रहरी घाइते भएका हुन् ।

गत सोमबार साँझ भएको झडपले उग्ररुप लिएपछि एक जनाको मृत्यु हुनुका साथै सात जना प्रहरी घाइते भएका थिए । घाइतेहरुको भारतीय अस्पतालहरुमा उपचार भइरहेको सीमा पारीका गाउँ झरोखर थाना (प्रहरी चौकी) का एक प्रहरी अधिकारीले बताएका छन् ।

झडपमा विहार समस्तीपुरका ५५ वर्षीय प्रहरीका सहयोगी ‘होम गार्ड’ हृदयनारायण रायको मृत्यु भएको झरोखर प्रहरी कार्यालयका ती प्रहरी अधिकारीले बताए ।

आमवा गाउँका जनप्रतिनिधि मनोज जयसवाल भरोखरबाट आफ्नो घरतर्फ जाँदै गर्दा बाटोमा मादक पदार्थ जाँच गर्ने प्रहरीको टोलीसित भेट भएपछि प्रहरीले मादक पदार्थ सेवन गरे/नगरेको जाँच गर्न खोज्दा उनीहरुबीच विवाद भएको थियो । विवाद भएको जानकारी पाएपछि झरोखर गाउँका अर्का जनप्रतिनिधि अभय पासवान त्यहाँ पुग्दा तिनीहरुबीच झन् विवाद बढ्यो ।

यही विवाद भइरहेको र प्रहरीले पासवानलाई कुटेको खबर स्थानीयले पासवानको घरमा दिएपछि गाउँका सयौं महिला, पुरुष उर्लेर घटनास्थल पुगी प्रहरीमाथि आक्रमण गरेका थिए । त्यही क्रममा विवादले उग्र रुप लिँदा दुई पक्षीय झडप भएपछि एक प्रहरी सहयोगी भनिने ‘होम गार्ड’ दर्जा (पद) का रायको मृत्यु र सात प्रहरी घाइते भएका हुन् ।

त्यसैले त्यहाँ प्रहरीको कारबाहीले स्थानीयहरुमा भागाभाग भएको छ । सीमा नाका बन्द गरिएको छ । प्रहरीले झरोखर गाउँका कैयौंलाई पक्राउ गरेको छ । 

भारतीय प्रहरी तथा सीमा सुरक्षा बल (एसएसबी) बलले झरोखर सीमा नाकाबाट न नेपालीलाई पारी जान दिएको न भारतीयलाई वारी आउन दिएको छ ।

लुकीछिपी नेपाल प्रवेश गरेर भारतीय गाउँ आमवा र झरोखर गाउँका बासिन्दाहरु नेपालतर्फ आश्रय लिएर आफन्तको घर तथा सार्वजनिक ठाउँमा बस्न थालेका छन् । उक्त क्षेत्रमा स्थानीयहरुको भागाभाग भएपछि त्रास फैलिएको छ ।