आरकेस्ट्रा नल्याएको झोँकमा आयोजकको ज्यान लिने प्रयास , तीन जना घाइते

जनकपुरधाम- मेलामा आफूहरूले भनेको आरकेस्ट्रा नाच नल्याएको भन्दै धनुषामा कृष्णाष्ठमी मेला आयोजक समितिमाथि ज्यान मार्ने प्रयास भएको छ।

धनुषाको कमला नगरपालिका-१ मंगराहास्थित व्यक्तिगत रूपमा आयोजना गरिएको कृष्णाष्ठमी मेलामा आरकेष्ट्रा नाच ननचाएको भन्दै आयोजकमाथि ज्यान मार्ने प्रयास गरिएको हो।

शुक्रबार राति करिब १० बजेतिर मेलाका लागि डिजेल लिएर फर्किरहेका केही युवाहरूले बीच बाटोमा रोकेर ज्यान मार्ने प्रयास गरेको धनुषा प्रहरीले जनाएको छ।

डिजेल लिएर फर्किरहेका आयोजक समितिका तीनजना युवाहरूलाई कमला नगरपालिकाको मंगराहा र नरहा टोलको बीचमा टाउको, आँखा तथा अनुहारमा निर्घात कुटपिट गरि घाइते बनाइएको छ। निर्घात कुटपिटबाट घाइते हुनेहरूमा मेला आयोजक समितिको तर्फबाट रहेका सिरहाका रवीन्द्र राम, सिरहा थलहाकै दीपेन्द्र यादव र कमला नगरपालिका वडा नं. ३ लगमाका लभ कुमार महरा रहेका छन्। उनीहरूलाई ज्यान मार्ने उद्देश्यले नै कुटपिट गरिएको घाइते यादवले बताए।

घाइते तीनै जनाको प्रादेशिक अस्पताल जनकपुरधाममा उपचार भइरहेको छ। आक्रमणमा परेकाहरूको मामा राम पुकार महराको घरमा मेला महोत्सवको व्यवस्थापनमा खटेका थिए। उनीहरूको साथबाट आक्रमणकारीहरूले स १० प ६२७६ नम्बरको पल्सर मोटरसाइकलसहित उनीहरूको साथमा रहेका दुई थान मोबाइल, २५ हजार रुपैयाँ नगद लगायतका सामान लुटेर भागेको यादवले बताए।

कृष्णाष्ठमी मेलामा आरकेष्ट्रा नचाउने कुरा भए पनि आरकेष्ट्रा ननचाएको भन्दै लगमाका केही युवाहरूसँग नाच कार्यक्रमको बेला नै भनाभन भएको थियो। रातिमा नाच गराउनको लागि विद्युत कटन सक्ने भन्दै जेनेरेटरको लागि डिजेल ल्याउन जाँदा उनीहरूलाई ती युवाहरूलाई पिछा गरेको यादवले जानकारी दिए।

सुरुमा लगमा बजारस्थित रहेको पेट्रोल पम्पमा डिजेल ल्याउन जाँदा त्यहाँ नभेटेपछि कमला नगरपालिका-६ मडानस्थित रहेको पेट्रोल पम्पबाट डिजेल लिएर मंगराहातर्फ जाँदै गर्दा मंगराहा र नरहाकोबीचमा रोकेर ज्यान मार्ने प्रयास गरिएको हो।

घाइते लभ कुमार महराले सोही ठाउँ बस्ने अनु यादवको छोरा अन्दाजी १८ वर्षको विजय यादवसहित ५–६ जना मिलेर ज्यान मार्ने प्रयास गरेको बताएको छन्। उनीहरूसँग साँझ भनाभन भएको थियो।

तीनै जनालाई फाइटर र फलामे हतियारले प्रहार गरेको देखिएको छ। टाउकोमा गम्भीर चोट लागेको एक जनाको अवस्था गम्भीर रहेको छ।

धनुषा प्रहरी प्रमुख विश्वराज खड्काका अनुसार ​पीडितको बयानको आधारमा अहिले दुई जनालाई पक्राउ गरी अनुसन्धान सुरु भएको छ। घटनामा तीन जना फरार छन्।