रगत लत्पतिएको अवस्थामा ट्याक्सीमा चढ्न लागेका उनको मुखबाट निस्कियो ‘मार्‍याे -मार्‍याे’

काठमाडौँ- महानगरपालिका-३२ तीनकुनेस्थित गैह्रीगाउँमा आज एकै परिवारका तीनसहित ४ जनाको विभत्सरूपमा हत्या भयो। दोलखाका कुमार भुजेल, उनकी श्रीमती अम्बिका, आमा सुभद्रा र मोरङका नवीन राईको हत्या भएको हो। उनीहरूको टाउको र शरीरका विभिन्न भागमा खुकुरी जस्तो धारिलो हतियार प्रहार भएको छ। 

घटनामा संलग्न रहेको आशंकामा एकजना समातिएका छन् भने अन्य केहीलाई पनि नियन्त्रणमा लिएर अनुसन्धानको दायरा फराकिलो पारिएको छ। प्रहरीले उक्त  घटनाको अनुसन्धानका लागि एसएसपी सोमेन्द्रसिंह राठौरको संयोजकत्वमा पाँच सदस्यीय टोली गठन गरिरकेको छ।

हत्या हुँदा घटना स्थलमा रहेका २८ वर्षीय दीपेन्द्र राई रगत लत्पतिएको अवस्थामा पक्राउ परेकाले उनीबाट घटनाको कारण पत्ता लाग्ने ठूलो विश्वास गरिएको छ। उनी  घटनामा संलग्न हुनसक्ने केही प्रमाणले पुष्टि गर्ने अनुमानका आधारमा उनलाई केन्द्रविन्दुमा राखेर प्रहरीले अनुसन्धान गरिरहेको छ। 

घटना गएराति ११ : ५५ बजेतिरको हो। घटना भएको सूचना प्रहरीलाई प्राप्त हुनेबित्तिकै भ्यान लिएर प्रहरी टोली घटनास्थलमा पुग्दा राई रगत लत्पतिएको अवस्थामा घटनास्थल केही पर ट्याक्सी चढ्दै गरेका थिए। 'हामीले राई ट्याक्सीमा चढ्दै गरेको देख्यौँ, हामीलाई ती व्यक्ति त्यही घटनासँग जोडिएका हुन् भन्ने शुरूमा थाहा भएन, जब प्रहरीको भ्यान नजिकै पुग्यो, उनी हडबडाए', घटनास्थल पुगेका एक प्रहरी अधिकृतले त्यो क्षण सम्झँदै भने, 'त्यही बेला उनको मुखबाट आवाज निस्कियो-मार्‍यो मार्‍यो, बल्ल हामीले उनी पनि घटनामा संलग्न रहेको आशंका समातेका हौँ।'

उनको अनुमान राई त्यहाँबाट भाग्नका लागि ट्याक्सी चढ्न थालेका थिए। प्रहरी कार्यालय आउन लागे जस्तो देखिएको थिएन। यदि प्रहरीमै आउने योजना बनाएका भए उनले आफ्नो मोटरसाइकल प्रयोग गर्थे। उनको मोटरसाइकल पनि रहेको छ। 

ती अधिकृतले उनको व्यवहार रक्सी खाएको जस्तो देखिएको बताएका छन्। उनीसहित केही शंकास्पद व्यक्तिलाई नियन्त्रणमा लिएर सोधपुछ जारी रहेको काठमाडौँ उपत्यका अपराध अनुसन्धान कार्यालयका प्रमुख, प्रहरी वरिष्ठ उपरीक्षक सोमेन्द्रसिंह राठौरले बताए। उनलाई काठमाडौँ उपत्यका प्रहरी कार्यालयले उक्त घटनाको अनुसन्धान समितिका संयोजक तोकेको छ। 

उनले भने, 'घटना गम्भीर छ, धेरै क्लुमा अनुसन्धान जारी छ, अहिले यही नै हो भनेर भन्न सकिने अवस्थामा छैन, यत्ति हो राई रगत लत्पतिएको अवस्थामा भेटिएकाले उनी एउटा ठूलो प्रमाण भने पक्कै हुन्।'  तर कस्तो खालको प्रमाण भनेर खुलाइएको छैन। 

राठौरले अहिले नै संलग्नता भने यकिन गर्न नसकिने जवाफ दिए। तर प्रहरीले घटना रिसिइबीले नै भएको प्रारम्भिक अनुमान गरेको छ। प्रहरीले घटनाको अनुसन्धानमा तालिमप्राप्त कुकुरसमेत प्रयोग गरेको छ। गम्भीर प्रकृतिका घटनामा कुकुरको प्रयोग गर्ने गरिन्छ।

दोलखाका ५५ वर्षीय कुमार भुजेल दुई दशक बढीदेखि उक्त मिलमा काम गरिरहेका थिए। उनका बुबा पनि यसअघि त्यही मिलमा काम गरेको स्थानीयहरूबाट जानकारी आएको छ। काम विशेषले आमा शुभद्रा औँसीदेखि यहाँ आएर बसेकी थिइन्। उनकी श्रीमती अम्बिका भुजेलसहित एकै परिवारका तीनै जनाको हत्या भएको हो। उनीहरूसँगै मोरङको बेलबारी घर भएका नविन राईको पनि सोही घटनामा मृत्यु भएको छ। नविनको पक्राउ परेका राईसँग पुरानै चिनजान रहेको प्रहरीले जनाएको छ। 

त्यो दोलखाका व्यवसायी बालकृष्ण शिवाकोटीको मिल हो। उनी भने गौशाला बस्ने गरेका प्रहरीले दिएको विवरणमा उल्लेख छ। प्रहरी अहिले घटनामा तिनै राई संलग्न हुन की होइनन्, चारचार जनाको एकै व्यक्तिले हत्या गर्न सक्छ की सक्दैन, घटनामा अन्यको पनि संलग्नता थियो की थिएन ? यी प्रश्नको उत्तर खोजिरहेको छ।