क्रान्तिकारीको केन्द्रीय अनुशासन आयोगको अध्यक्षमा अमिरराज खरेलले जित्ने आधारहरु यस्तो !

काठमाडौं । नेकपा (माओवादी)स केन्द्र निकट अनेरास्ववियू–क्रान्तिकारीको १२ गते हुने निर्वाचनका लागि अमिरराज खरेलले केन्द्रीय अनुशासन आयोगको अध्यक्ष पदमा उम्मेदवारी दिएका छन् ।

संगठनका विद्यार्थी नेताहरुले मनोनयन दर्ता हुनु अगाडिसम्म खरेलको उम्मेदवारी महासचिव अथवा उपाध्यक्षमा आउन सक्ने आंकलन गरेका थिए । तर उनले अनुशासन आयोगको अध्यक्षमा उम्मेदवारी दिए । उनी ‘हेटक्वाटर’ अर्थात पुष्पकमल दाहाल प्रचण्डकै एक मात्र निर्विकल्प उम्मेदवार रहेको चर्चा अनेरास्ववियू क्रान्तिकारीभित्र चलेको छ । २०६४ सालदेखि ललितपुरमा रहेर पाटन संयुक्त क्याम्पसबाट राजनीति सुरुवात गरेका खरेलले पाटन क्याम्पस कमिटिको अध्यक्ष, ललितपुर जिल्ला समितिको संयोजक र अध्यक्ष समेत भएर काम गरिसकेका छन् । विद्यार्थी राजनीतिसँगै आफ्नै व्यवसाय गरेर आत्मनिर्भर बनेका खरेल विद्यार्थी, नेता र कार्यकर्ताका सहयोगी, मिलनसार र विश्वासिला पात्र मानिन्छन् । साथै, विद्यार्थीहरु माझ लोकप्रिय पनि छन् ।

ललितपुरको पाटन क्याम्पसबाट व्यवस्थापनमा स्नातक गरेका खरेल कुटनीति र राजनीतिमा बढी चासो राख्छन् । उनलाई समकक्षीहरूले उतर कोरियाली नेता किम जोन उनसँग दाँज्ने पनि गर्छन् । खरेलसँग विपक्षीलाई समेत मिलाएर अगाडि बढ्न सक्ने स्वभाव रहेको उनका निकट साथीहरु बताउँछन् ।  गृह जिल्ला काभ्रेबाट एसएलसी उत्तिर्ण गरेका खरेल पाटन क्याम्पसमा स्नातकोत्तर पढ्दैछन् । 

केन्द्रीय अनुशासन आयोगको अध्यक्ष पदमा उम्मेदवारी दिएका खरेलले आफ्ना योजनाहरु र प्रतिवद्धताहरु सार्वजनिक गरेका छन् । उनका योजना र प्रतिवद्धताहरु यस्ता छन् ।

१. विद्यार्थीका एजेण्डाहरूको संकलन गरेर नगर, जिल्लाको आयोगमार्फत सुझाव संकलन गरेर मात्र संगठन परिचालन गर्ने विधि स्थापित गर्न

२. सत्य, तथ्य र निष्पक्ष रुपमा जानकारी दिन मातहतको कमिटीलाई अनलाईन प्रणालीमा पहुँच पुर्याउन,

३. पार्टी संगठन र विद्यार्थीका नीति, नियम र चेन अफ कमाण्डलाई अझ सशक्त गर्न,

४. राष्ट्रिय, अन्तर्राष्ट्रिय स्तरमा कम्युनिष्ट पार्टीका कार्यक्रम र विचार आदान प्रदानमा जिल्ला स्तरको प्रतिनिधित्व गराउन,

५. शैक्षिक बहस र बदलिँदो शैक्षिक आवश्यकतामा आम प्रतिनिधिहरूको आवाजमा पार्टी पङ्तिलाई जानकारी गराउन र नीतिगत तहहरूमा छलफल गराउन

७. विद्यार्थी संगठन साँच्चीकै पार्टीको वैचारिक अंग हो भन्ने अनुभूति गराउन,

संगठनको मूल नेतृत्व दाबी गरेका खरेलले पार्टी अध्यक्ष, महासचिव र अन्य पदाधिकारीसँगको भेट गरी मनोनयनको अन्तिम समयमा खुमलटार पुगेर फर्किए पछि अनुशासन आयोगको अध्यक्षमा मनोनयन दर्ता गरेका थिए । अध्यक्ष प्रचण्डकै निर्देशनमा उनी मूल नेतृत्वबाट पछि हट्दै आयोग अध्यक्षमा मनोनयन दर्ता गरेको हुन सक्ने उनका निकटतम् व्यक्तिहरूले बताएका छन् ।

अखिल क्रान्तिकारीको गएको असोज १० गतेदेखि सुरु भएको केन्द्रीय सम्मेलन उमेर हदमा विवाद भएपछि स्थगित भएको थियो । उमेर हद लगाउने कि नलगाउने भन्ने निर्वाचनमा उमेर हद लागू गर्नुपर्ने पक्षमा बढी मत परेपछि  विधिअनुसार नै  १२ गते शनिबार निर्वाचन हुने भएको हो । सङ्गठनमा ३२ वर्षे उमेर हद लागेपछि यो निर्वाचनमा नयाँ अनुहारहरूले नेतृत्व तहमा दाबी गरेका छन् ।

शनिबार हुने निर्वाचनका लागि आठ गते बुधबार मनोनयन दर्ता खुलाएको थियो । पदाधिकारी र सदस्यका लागि कुल ५०० जनाको उम्मेदवारी परेको छ । मनोनयन दर्ताको प्रारम्भिक सूचीअनुसार ३३ पदाधिकारी, सचिवालय सदस्य, केन्द्रीय सदस्य, आयोगका पदाधिकारी तथा सदस्य गरी कुल ३१२  पदका लागि ५०० जनाको उम्मेदवारी परेको निर्वाचन आयोगले जनाएको छ ।

केन्द्रीय अनुशासन आयोगको अध्यक्ष पदका लागि इन्दिरा पुरीले पनि उम्मेदवारी दिएकी छिन् ।

संगठनको अध्यक्ष पदका लागि उपदेश यादव, सुदिन पौडेल, हेमन्त राई, विजय सापकोटा, विश्वमणि थापा र योगेन्द्रबहादुर बुढा प्रतिस्पर्धामा उत्रिएका छन् ।

माओवादीको केन्द्रीय नेतृत्वले अखिल क्रान्तिकारीको नेतृत्व सर्वसम्मत टुंग्याउन खोजे पनि सहमति नजुटेपछि प्रतिस्पर्धाबाटै टुंगिने भएको हो ।