अदालतमा प्रतिवादी लक्ष्मी महर्जनको बयान सुरु

काठमाडौँ- काठमाडौँ जिल्ला अदालतमा प्रतिवादी लक्ष्मी महर्जनको बयान सुरु भएको छ । नेपालीलाई भुटानी शरणार्थी बनाएर ठगी गरेको अभियोगमा मुछिएकी महर्जनको आइतबार न्यायाधीश  प्रेम प्रसाद न्यौपानेको इजलासमा बयान सुरु भएको हो । 

आज मुख्य अभियुक्तमध्येका एक इन्द्रजित राईसहित तीन जनाको बयान हुने भनिएपनि राईले स्वास्थ्य ठीक नभएको भन्दै बयान दिन आनाकानी गरेपछि लक्ष्मीको बयान लिन थालिएको हो । 

लक्ष्मीको खातामा ठगी गरेको रकम जम्मा गरिएको प्रहरी अनुसन्धानबाट खुलेको छ । सन्देश शर्माले लक्ष्मीको खाता नम्बर पठाएअनुसार गजेन्द्र बुढाथोकीले लाखौँ रुपैयाँ जम्मा गरेको अनुसन्धानबाट खुलेसँगै उनी पक्राउ परेकी हुन् । लक्ष्मी नेपाल प्रहरी अस्पतालमा नर्सको रुपमा कार्यरत रहेको बताइएको छ । 

यसैबीच बयान दिन आनाकानी गरेका राईको आज बयान हुने नहुने निश्चित भएको छैन । यसअघि उनले टि ब्रेक पछि बयान दिने बताएपनि अझै बयान हुन नसकेको हो । 

तर, अदालतमा लक्ष्मीबाहेक राईसहित सन्दीप रायमाझी र टंक कुमार गुरुङको भने बयान भइरहेको छ । यसअघि शुक्रबार  सागर राई र केशव प्रसाद दुलालको लिइएको थियो । नक्कली भुटानी शरणार्थी प्रकरणमा हालसम्म १७ जना पक्राउ परेका छन् । 

जसअनुसार नेकपा एमालेका निलम्बित सचिव टोपबहादुर रायमाझी, कांग्रेस नेता तथा पूर्वगृहमन्त्री बालकृष्ण खाँण, उपराष्ट्रपति कार्यालयका बहालवाला सचिव टेकनारायण पाण्डेलगायत उच्च पदस्थहरू समेत पक्राउ परेका छन् । 

गत बुधबार  उनीहरूविरुद्ध ठगी, सरकारी लिखत किर्ते, राष्ट्रियताविरूद्धको अपराध, संगठित अपराध र एकीकृत कसुरमा मुद्दा दायर भएको थियो । 

कुल ३० जनालाई प्रतिवादी बनाइएको मुद्दामा १३ जना अझै फरार छन् ।